Då eg kom til Bodø, fekk eg ta bussen gratis til sentrum frå flyplassen. Sikkert fordi eg såg så forvirra ut, drog på stor kamerasekk og spurte om studentrabatt. Eg hugsa heller ikkje namnet på hotellet eg skulle bu på, så eg prøvde meg litt fram og til slutt kom vi fram til at det heitte Zefyr og at verken bussjåføren eller den eldre dama i fremste sete hadde høyrt om det, men ein resonnerte seg fram til at det måtte vere sjukehushotellet, eller hospitset? Eg vart litt nervøs. Eg er på reportasjereise og ikkje på sjukehusturne og såg meg sjølv brått blant beinbrot og verre ting.
Den eldre dama i fremste sete ringte då til opplysninga for å finne ut nummeret til sjukehuset og så til sjukehuset for å høyre kva sjukehushotellet heiter, og det heitte Zefyr. Dermed viste den eldre dama og bussjåføren meg vegen heilt fram til hotellet, og hotellet viste seg å vere heilt ypperlig. Eg gjekk så dei ti minutta til Bodø sentrum for å kjøpe meg litt mat og havna her:
Eg sit å et dårlig burger ved sida av ein blå bosscontainer med påskrifta "Østbø - fra avfall til råstoff", og drikk rådyr Arctic beer. Har erfart at ca annakvar burger eg prøver meg på, er under min burgerstandard for kva som er godkjent å ete. Eg les i Avisa Nordland at turistar som kjem til Bodø sjøvegen blir møtt av søppel: bilvrak, skrot og utrangert anleggsutstyr som ligg i fjøra. Forferdeleg stygt, seier turist til Avisa. I bakgrunnen er det listepop. Av og til tenker eg at det er dumt å tenke på at ein skal spare pengar når ein skal ete. Då blir resultatet kald burger og listepop bak ein søppelcontainer. Eg skal tenke meg om neste gong eg sparer.
Det er litt sånn typisk at sånt slenger i fjøresteinen. Her igår, søndag, var eg i Eikefjorden i Sunnfjord på verdas koselegaste kafe, Nærleiken, som er heilt nystarta, men før eg gjekk inn på kafeen, rusla eg litt rundt i sentrum og der stod det masse bilar med knuste ruter, der var restar etter bål, blekkboksar og anna skrot som låg rundt og dette, i tillegg til mange meir eller mindre vakkert parkerte redningsbilar, tok opp ein ganske stor del av sentrum. Uansett. Bort mot sentrum har dei uansett laga det nydelig til med promenade, dvs gangvei og kai og båter og flott. Så Eikefjord gjekk i pluss inntrykksmessig sjølv om der var mykje skrot midt i sentrum.
Sjå berre her kor fin kafeen er, og alle møblane kan du kjøpe. Nærleiken kafe ligg altså i Eikefjorden mellom Naustdal og Florø i Sogn og Fjordane. I kjellaren er det butikk med rettferdige varer.
